Tegnieke Vir Kleinbek-Geelvis In Strome

Kleinbek-geelvis is natuurlik aangepas in terme van hul liggaamsvorm om in strome te leef - die lyf vorm, spierstruktuur en fisiologie is baie aanduidend van ‘n vis wat in sterk vloeiende water moet kan swem, wei en broei. Stroomhengel vir geelvis is meer bekend in terme van vlieghengel waar hengelaars stroom op werp en die lyn natuurlik laat afdryf. Om vir kleinbekke met aas te hengel is egter ‘n verskillende storie omdat dit moeiliker is om aas in dieselfde manier stroom op te hengel. Om kleinbek-geelvis spesifiek in strome te teiken kan baie effektief gedoen word, maar jou metode van hengel moet effe aangepas word om konstante sukses te behaal. Onthou dat in meeste gevalle kom ander spesies soos baber, karp, moggel en moddervis in dieselfde water ook voor. Om die meeste van ‘n stroom gedeelte te benut is die beste manier om baie rond te beweeg deur eerder ‘n kortbroek of waterbroek aan te trek en dan in die strome versigtig te loop. ‘n Klein gele wat op ‘n kort strop onder ‘n “bubble float” gehengel is het gesorg vir hierdie mooi geelvis uit die Visrivier. Geelvis kan in skole voorkom, maar hulle is meer loslik geassosieer met mekaar as wat die geval met karp is. Dus moet daar gedurig rondbeweeg word om areas te kry waar enkel visse of ‘n paar vis in ‘n area hul posisie hou. Die gerei wat benodig word is ook relatief lig: ‘n 6vt of 8vt grafietstok is ideaal met ‘n klein koffiemeulkatrol gelaai met ligte lyn of braid. Een van die beste benaderings is om met ‘n enkel stok te hengel, met ‘n Paternosterstrop en wit deeg vir aas. Uitstekende aas is ook een of twee erdwurms wat op die hoek geryg kan word. Die strop kan saamgestel word uit ‘n enkel drie-rigting draaispil en ‘n klein ½ - 1 ons sinker. Hierdie metode is veral effektief wanneer jy groot areas van die stroom ondersoek en verskeie stroomversnellings, riffels en poele hengel. Om so vis te vang gooi stroomaf in areas wat belowend lyk vir geelvis en voel dan vir die baie kenmerkende pluk bewegings wat daarop aandui dat ‘n gele besig is om die aas te vat. Sodra jy dit voel kan jy die stok se punt effens laat sak soos die plukke sterker raak en dan hard vaskap. Wees gereed, geelvis bars gewoonlik in ‘n baie sterk hardloop slag in wanneer jy so vaskap en dit is juis waar beter katrolle met ‘n goeie remstelsel uiters noodsaaklik is. Die kenmerkende dik lippe van ‘n stroom geelvis. In riviere soos die Oranje, Vaal en Vis kan hengelaars maklik ‘n hele dag so deurbring en keer op keer vis aankeer. Onthou om ‘n goeie skepnet saam te vat en dit is ook handig om ‘n stewige wandelstok te gebruik waarmee jy die bodem makliker kan voel en jouself keer om te val. ‘n Ander tegniek waarvan ek persoonlik hou is om met “bubble floats” te hengel. Hierdie deurkskynende, ronde dobbers kan halfpad met water gevul word, waarna die aas op ‘n klein strop onder die dobbertjie gehengel word. Met hierdie tegniek kan jy ook stroomop hengel en die aas af na jou toe laat dryf terwyl jy wag vir die dobbertjie om eweskielik te verdwyn. ‘n Tipies geelvis strop met ‘n klein krap aas. Ander aas soorte wat goed op dieselfde strop werk is erdwurm, rysmiere and krieke. Om vis vanaf ‘n enkel plek op die oewer te teiken is dit nodig om ‘n plek te kies waar jy stil kan sit en al jou gerei op te stel. Een tegniek wat ek glo ons in Suid-Afrika nog nie genoeg ontwikkel het nie is om effektief voerkolle in strome te kan skep, maar ‘n effektiewe metode is om klein hoeveelhede voer gedurig in die water te gooi om meer vis in te bring. Weens die sterk stroomvloei word die stokke so geplaas dat hulle effe stroomaf wys en nie reghoekig teenoor die stroom rigting nie. Klein eilande binne die stroom is ideaal, omdat daar dikwels ‘n waterversnelling een of beide kante daarvan is waar geelvis lief is om te wei op die kos wat na hulle toe spoel. ‘n Area waar ‘n vinnige stroom in ‘n groter, stadige poel invloei is altyd ‘n goeie area om vir kleinbek-geelvis te hengel. Goeie aas soorte vir geelvis kan baie wissel. Hierdie vis is sterk omnivories so sy kos bestaan uit verskillende kossoorte. Hulle is veral afhanklik van die larwes van akwatiese insekte soos byvoorbeeld eendagsvliegies (“Mayflies”) en muskietlarwes. Hulle sal ook gretig enige ander insekte wat op die water oppervlak val opraap, wat veroorsaak dat jy dikwels in die laatmiddag of vroegoggend baie voedingsaktiwiteit sien soos hulle gedurig die wateroppervlak breek. Groter kos items soos klein krappe, vissies en paddas word onder andere ook gereeld gevreet. Van my gunsteling aas soorte is wit deeg, bruin brood gemeng met vanielje, erdwurms en veral klein krappies as jy hulle in die hande kan kry.