Wanneer die land weer oop is vir hengel… Trichardsfonteindam

11- keer Protea hengelaar Neville Foord hengel Trichardsfonteindam en verskaf waardevolle inligting vir kompeterende asook sosiale hengelaars. Diè dam is vir meeste kompeterende hengelaars 'n bekende venue en word gereeld by die Teksa of publieke kant gehengel. Vir my is dit altyd 'n lekker dam om te gaan hengel omdat die visse altyd honger en goed aan die byt is ongeag die weersomstandighede. Daar is ook die bekende Sasol kant waar kompetisies gereeld aangebied word, maar dit maak eintlik nie saak op watse een van die 3 oewers jou sessie gehengel word nie, want die aanbevelings vir die dam bly dieselfde. Wind! My ondervinding van die dam is dat hoe “slegter” die weer hoe beter die vangste! Die wind speel hier die grootste rol - as jy 'n windverwaaide (klink beter as winderige) dag by Trichards ervaar moet jy weet jy is in vir 'n groot sak vis! Wind gepaard met sagte reën en bewolkte toestande is perfek vir Trichard, so moenie laat slegte weer jou afsit van 'n Trichard sessie nie! Klein vis... Die dam is bekend vir kleinvis vandat ek kan onthou, daarom moet jy in ag neem dat hard gewerk moet word om 'n sak vis bymekaar te maak wat 'n goeie plasing gaan gee. Die feit dat dit klein visse is wat geteiken word beteken dat jou voorbereiding hiervoor gepas moet wees. Hoeke in #0.8 grootte is meer gepas as byvoorbeeld ‘n #1. 'n Sensitiewe hoeklyn van 7lb (0.21mm) is meer as voldoende en ek raai dit aan om glad nie dikker te gaan nie. Maak seker jou gerei is verfyn om sodoende meer van die jonger vis gevang te kry. Van groot na klein om jou “strike rate” te verbeter! Begin met 'n normale voerbal om die sinker en gaan later al hoe kleiner - dit maak 'n wesenlike verskil aan die vangste. 'n Groot voerbal is goed om die dag mee af te skop om sodoende 'n voerplek te “stig” maar dit kan veroorsaak dat jy te veel vis lok en later baie byte kry maar baie vis in die proses verloor; skakel dus oor na 'n voerbal so groot soos 'n eier na die eerste 2 ure, die visse sal positief byt en jy sal nie baie vis verloor nie! SAGTE voer! Dit is uiters belangrik om die 2 tot 1 verhouding te gebruik om jou voer aan te maak. Hoe sagter die voer hoe beter - tydens my sessie het ek met opset die voerbal harder gemaak en die visse het die voerbal rondgestamp sonder dat die hoek hulle gehaak het, natuurlik reflekteer dit op jou poliesman as 'n positiewe “byt” maar wanneer jy aanslaan is daar NIKS. 'n Sagte voerbal het feitlik die storie heeltemal ge-elimineer - wanneer die poliesman sak of as die lyn stokstyf staan is die vis elke keer aan, met die harder voerbal nie. Afstand Die belangrikste aspek oor die afstand is om tussen die vis te wees en nie oor of voor die vis nie. Ek het begin op 65m en 90m en binne die eerste uur het ek besef dat die 90m te ver was omdat ek 12 karpies reeds op 65m gevang het sonder 'n byt op 90m, en dadelik het ek die 90m lyn verruil vir 65m. Alhoewel ek weet dat daar groter vis op 90m is, het ek steeds die besluit geneem om eers soveel as moontlik van die jonger vis in my net te sit. Die groter vis sou ek later in die sessie teiken as ek voel dit is nodig. Onthou altyd: “as dit pap reën moet jy skep!”. Verloop van ‘n tipiese sessie... Op hierdie spesifieke dag gedurende Februarie het ek duidelik gesien dat die vis in die oggend nie wil byt op die 90m merk nie en die feit dat ek toe met al twee stokke op 65m gehengel het, het gemaak dat ek meer vis in my net sit. Twee ure voor die einde van die sessie moes ek weer die besluit neem om dieper te gaan met een stok om sodoende 'n paar groter vis in my net te sit, en het ek die 90m stok weer gegooi. Binne 5 min het die eerste byt gekom en 'n skaflike karp van by die 3kg het my net van binne af gesien. Daarna volg 'n vis elke 15 minute wat op gemiddeld 500g-1,5kg weeg. Duidelik begin die groter vis eers later voer so onthou om in die oggend naby te hengel en later in die middag, so van 12:00 af, dieper te gaan met een stok om 'n goeie balans tussen hoeveelheid en gewig te handhaaf. Hoeveelheid vs Gewig Wanneer die vis wat uitkom almal klein vis is (100g-450g) is dit belangrik om soveel as moontlik van hulle in jou net te sit voordat jy met een stok gaan soek vir groter vis. Die groter vis kan 'n maak-of-breek wees vir jou sak maar 1 groter vis van 1,5kg of meer haal maklik 'n hele paar van die klein vissies uit! Handhaaf dus 'n goeie balans en maak seker jou meerderheid bestaan uit die vis wat die vinnigste byt. Daarom skuif ek een stok dieper wanneer daar net 2 ure van die kompetisie oor is.