Vaal Trio – Vosrite

Ek en Derick Labuschagne was weer by Vosrite buite Parys by ‘n unieke gedeelte van die Vaalrivier waar ons weet die groot visse skuil. Ons wou kyk of ons nie die 10kg merk kon breek nie en het reggemaak vir ‘n deurnag sessie met groot aas, dik lyn en skerp hoeke. Likkewaankamp Dié keer het ons die stokke staande gemaak by ‘Likkewaankamp’ wat die grootste kamp op die terrein is en ook die verste stroom af. Ons kon gemaklik ons tent en al ons hengel gerei opslaan op een helfde van die terrein wat ‘n bewys is van hoe groot die terrein werklik is. Daar is trappies wat afgaan water toe wat die land van vis baie vergemaklik. Die terrein beskik oor 2 krane met vars, drinkbare boorgat water, ‘n grasdak afdakkie vir koelte in die warm somer dae, die heerlikste stort en ‘n spoel-toilet. Die baie bome wat die terrein omsingel sorg dat die terrein amper voldag koelte het. Likkewaan kamp het oorgenoeg spasie om gemaklik te hengel en te kamp. Benut jou tyd Ons het 07:00 een Woensdag oggend by die water arriveer en voor ons enige iets begin doen het aan ons kampeer toerusting het ons eers die stokke vir die ‘marker float’ en die ‘spomb’ uitgehaal saam met 25l gekookte kaboems en tigers. Eerstens het ek en Derick die 92g gewig gegooi om die kontoere van die bodem te bepaal asook die dieptes en om te kyk vir obstruksies onder die water. Dit is van kardinale belang om eers jou hengel area baie noukeurig te ondersoek voor jy ‘n groot lot mielies en voer op ‘n area neersit - as daar ‘n obstruksie onder die water is of die water is baie vlak, sal dit jou sessie belemmer so onthou om altyd eers jou huiswerk te doen voor jy begin voer en hengel. Die regte diepte Met die gooi van ‘n swaar 92g gewig en braid hooflyn kon ons baie gemaklik die kontoere van die bodem meet en voel vir obstruksies onder die water. Ons het op 81m ‘n diep gat gekry van 4 tellings, skuins stroom-op en effens na regs. Sodra ons die gewig links werp dan kry ons 2 tellings so dit was duidelik dat daar dieper water na die regterkant is. Ons het die dieper water gemerk deur ‘n merker oorkant waar te neem en akkuraat vir die merker te werp. Nadat ons gemaklik was met die diepte en afstand het ons die gewig stadig op die bodem gesleep om te voel vir obstruksies en tot ons verbasing was die bodem redelik skoon vir die eerste 10m waarna ons ‘n klipbank ontdek het, so ons hengel area was volgens ons perfek, vry van obstruksies, ongeveer 4m diep en 10m agter ‘n klipbank. Die “spomb” gelaai met tigernuts en kaboems, ‘n baie akkurate en effektiewe manier van voer! Let op die vinger-hoedjie om jou vinger te beskerm teen die lyn wanneer jy gooi. Voer Derick het wit kaboem mielies en groot tiger nuts in water laat staan vir 24 uur en dit gekook vir 4 ure. ‘n Sweetcorn geursel was bygevoeg met die kook proses wat die mielies soos gesmelte botter en karamel laat ruik het - absoluut hemels vir groot rivier karpe! Ons het ‘n ‘large’ spomb gebruik om 25l van die mielies akkuraat te voer op die merker aan die oorkant in die dieper water na regs. Dit het ons ongeveer 2 ure geneem om die volle 25l uit te voer waarna ons eers begin kamp opslaan het. Dit beteken dus dat die voerkol kans gekry het om te rus terwyl ons kamp opgeslaan het en ons gerei gereed gemaak het vir die groot aanslag. Dag en nag Dit was baie opvallend om te sien hoe die visse se weipatrone verander soos wat die dag gevorder het. Gewoonlik byt die vis goed vroeg in die oggende en met skemer net voor die son onder gaan, maar met diè geleentheid het die natuur ons weereens verbaas! Ons het deur die dag slegs ‘n jong baber op ‘n 10mm pop-up gevang en ‘n geweldige lopie gekry op ‘n zig-rig maar die vis het ongelukkig afgekom. Derick het begin bekommerd raak en gewonder hoekom die vis nie byt nie maar ek het hom verseker met al die voer wat ons in die water gewerp het moes ons deur die nag iewers ‘n byt kry… …Dit was sterk skemer en net voor donker toe Derick se regter stok ‘n byt kry en met ‘n spoed wegtrek. Tien minute later skep ek die eerte vis vir die sessie, ‘n volskub karp wat die skaal trek tot oor 5kg. Stelselmatig het die visse begin wei soos wat die donker die aarde bedek het en met die volgende lopie was ek aan met die grootste vis van die sessie. Na 25 minute op die 14lb hooflyn met ‘n braid voorslag skep Derick my karp van 10,24kg. Die vis het ons lank besig gehou en ongelooflik hard baklei, ek kan julle verseker dat rivier karpe baie harder baklei as karpe wat in ‘n dam swem en dit maak die ervaring soveel beter. Bobaas hoekaas Ons het rondgespeel met verskillende hoekase maar die aas wat vir ons die beste gewerk het was een geskilde tigernut met ‘n klein stukkie geel spons bo-op. Diè aas het ons getoets in ‘n emmer water wat vir jou presies wys hoe dit lyk wanneer dit op die voerkol lè – basies krities gebalanseerd met die hoek se ogie wat die bodem raak. Ons het ook soos van tevore gevind dat die visse in dié gedeelte van die rivier gaande is oor bloekomgeur wat gemaak het dat ons die geskilde tigernuts daarin gedoop het. Die hoekaas vir Derick se PB karp.. Step 1 Step 2 Step 3 Step 4 Step 5 Step 6 Step 7 Step 8 Step 9 Nag van die lang karpe… Die visse het ons letterlik die hele nag besig gehou en ons het pragtige visse geland, fotos geneem en dadelik weer teruggeplaas. Daar was nie tyd vir slaap nie want net as ons wil uitjie knik dan hardloop ‘n katrol; dit was asof die vis al hoe beter begin byt het hoe later dit geraak het. Teen 02:00 die oggend kon ons nie die stokke in die water hou nie en daar was tye wat al 4 ons stokke buite die water was – ‘n absolute fees! Derick Labuschagne met ‘n Vosrite karp, kyk net daai groot stert! “Die rivier karpe baklei iets vreesliks vir hulle grootte, eks bly ek het 14lb lyn op my katrolle gelaai anders sal die visse jou afsny in die takke!” sê hy. My karp van 10,24kg. Ek is dood eerlik as ek sê die karp het ongelooflik hard baklei, selfs met die 14lb hooflyn het hy steeds geswem net waar hy wil, en soos met alle groot rivier karpe is dit stroom op! Derick se PB. “Die vis het my stroom-op gevat en toe weet ek, dis ‘n bielie!” Vang en vrylaat is baie belangrik - kyk net hoe veilig word die vis terug geplaas in die water met die gebruik van ‘n weegsak wat nie die vis kan seermaak of die slym verwyder nie. Dis ook beter om die vis in die weegsak vanaf die water na die weegstasie te dra en weer terug na die water want dan kan die vis nie uit jou hande spring en val nie. Die kondisie van die karpe is baie goed - diè een het egter ‘n merk op die sy wat ‘n teken kan wees van kuit skiet of baklei – ja, visse baklei ook!