Vaalrivier Sessies Om Te Onthou! -3

My Groot Karp By Vosrite Fishing - Parys Vir nog ‘n onthou-sessie beland ek en Derick Labuschagne by die bekende Vosrite Fishing-oord van Michael - oftewel “oom Vossie” en Magda Vosloo. Vosrite is buite Parys geleë op die Vredefort/Viljoenskroon pad en is ongeveer ‘n uur en ‘n half se ry uit Johannesburg. Hulle pas baie streng reëls toe en dit is juis hierdie reëls wat maak dat die bestemming so spesiaal is en “prentjie mooi” ‘n nuwe mening gee! Ek sê graag “dankie” aan hulle en hul seun Henning vir die uitnodiging om op ‘n pragtige stukkie aarde met ‘n gedeelte van die Vaalrivier wat absoluut uniek is te hengel! Wat die plek so uniek maak is dat daar privaat staanplekke is en dat geen dagbesoekers toegelaat word nie. Die staanplekke is ook ver uitmekaar sodat mens niemand het wat in jou spasie beweeg behalwe jy nie. Soos tannie Magda sê: “Ons het juis die staanplekke ver uitmekaar posisioneer vir privaatheid want toe ek en oom Vossie in ons jonger dae gekamp het, het ons altyd privaatheid geniet, nie dat ons oud is nie! ” Op hul webwerf, www.vosritefishing.co.za is al die inligting oor vangste, diens en kampeer terreine. Ek hou van die paar vragies wat hulle vra voor mens verder mag gaan sodra jy die webblad oopgemaak het; gaan loer gerus daar dan sal julle sien ek het nie gespeel toe ek praat van streng reëls toepas nie! Van die 6 staanplekke is 5 vir kampeer doeleindes en 1 is ‘n pragtige log-cabin wat tot 10 mense kan huisves. Ons het besluit om by die mees bekendste een, genaamd “Mana Pools” te hengel; dit is die heel eerste een aan die regterkant van die oewer as jy water se kant toe kyk. Die terrein het ‘n groot oop oewer met ‘n stroom wat aan die oorkant invloei ongeveer 75m van die kant af. Ons het spesiale toestemming gekry om net vir die dag te hengel want ons moes die volgende dag terug moes wees op kantoor. My aanbeveling is om te bespreek en gaan hengel en beleef self die paradys van Vosrite! ONS HENGEL Om 07:00 het die eerste voerballe die water getref en ek en Derick het soos ouder gewoonte besluit om weer ‘n paar sagte voerballe op ons afstande te gooi om die legendariese Vosrite “treine” na die omgewing te lok en hulle in “feeding mode” te kry! Die keer het ons ‘n halwe blikkie pitmielies by die voer gevoeg om die karpe iets te gee om uit te soek tussen die fyner voer partikels. Die voer absorbeer baie water en maak ‘n lekker sagte voerbal wat vinning blus en dra die reuk van warm mielies met botter sodra mens water byvoeg – perfek! Omrede ons 10m voor die stroom gehengel het in ‘n diep gat het ek gevoel dit is nodig om 10 balle te gooi om te sorg dat daar darem iets agterbly en nie te vinnig deur die stroom weggespoel word nie. Derick het 6 groot balle gegooi en ons eerste stroppe met hoeke en aas het kort daarna gevolg. Intussen het ons besluit om met ons tweede stok die “skof-ruggies”, soos ek hulle noem, te teiken. Dis nou muddies, maar nie die algemene Vaaldam-muddies wat soos sardientjies lyk nie, nee, hierdie is regte muddies, lyn brekers, stroom vegters, V6’e, noem hulle wat jy wil! Hulle is groot en sterk en jy sal weet as jy een aan die lyn het. Ons het op 45m ‘n paar bloedrooi voerballe gegooi om onsself die beste moontlike kans te gee om die sterk vegters aan die lyn te kry. Maar twee ure in die sessie met net ‘n baber in die net het ek en Derick mekaar soos twee ou getroudes wat nie saamstem nie aangekyk. Met die reën in die lug en die skielike verandering in temperatuur het die visse hul eetlus verloor en ek en Derick begin planne maak. Derick vang toe nog 2 babers op sy karp aas en die babers gee hom ‘n goeie geveg op die ligtegerei terwyl ek bytloos moes sit en toekyk hoe die boek homself lees, en dis toe dat ek die vliegstok uitkrap met ‘n paar hand-gebinde vlieë van die bekende vlieghengelgids en professionele vlieg binder, Rohan Koegelenberg. Derick met ‘n baie mooi sak op ‘n moeilike dag!Die grootste vis vir die dag, ‘n pragtige wilde Vosrite karp oor die 10kg merk!2 Oranje floaties met Sniper en vrugte op die voerbal!Derick met nog ‘n pragtige karp gevang in die reën.Die babers was baie aktief en het Derick se karpaas opgetel.Derick met sy eerste vis op die vliegstok, ‘n 1-kol Ghielemientjie!Derick met sy nuwe persoonlike beste karp! Aan die regterkant van Mana Pools is daar klippe met vlakker water en ‘n goeie stroom versnelling, perfek vir vlieghengel. Derick maak ook gebruik van die geleentheid en vang ‘n enkelkol Ghielemientjie op ‘n Mustard Caddis - sy eerste vis in sy lewe op ‘n vliegstok, en dit op sy tweede gooi! Ek kry ‘n paar goeie byte maar land slegs een jong geelvissie wat soos ‘n vingerling lyk. Terug na die oewerhengel staanders en Derick se linker stok is weg en my regter stok se lyn is heeltemal af… chaos! Derick vind gelukkig sy stok na ‘n kort soektog so 10m die water in maar die lyn is ook af. Nou moet ons fokus want iets is aan die kook en oor die volgende twee ure land Derick ‘n groot muddie, 2 babers en ‘n klein karp. Ek werk hard en vang 2 babers, een van ongeveer 2kg en ‘n baba van ongeveer 50 gram, maar die legendariese karpe van Vosrite fnuik ons steeds. Ek besluit om altwee my stokke te skuif na die dieper water omrede die muddie stok doodstil lê en die meeste aktiwiteit op die dieper lyn plaasvind; ten minste gee ek myself nou die beste kans om een van die groot karpe aan die lyn te kry met ‘n skoon pit as aas op die een stok, en ‘n 6mm ‘white chocolate soaker’ op die ander. Derick kry 2 pragtige karpe van ongeveer 7kg in die net en ons het nuwe hoop! Die klok slaan 16:00 en my katrol begin verwoed loop, en na 15 minute en ‘n stewige geveg met wat voel soos ‘n vet Vaalrivier karp voel ek hoe die vis deur ‘n obstruksie swem en my hoeklyne afsny! Teleurgesteld, mismoedig en effens depressief laai ek maar weer die enkel-hoek stroppe en werp altwee stokke terug na die 75m merk. Die wolke begin saampak in die suide en ons besluit om stadig te begin oppak; Derick haal sy net uit die water en ons was besig om die visse mooi te pak vir ‘n foto toe ons ‘n katrol hoor sing – my regter stok loop asof hy skuiling soek en ek maak vas met wat voel soos ‘n vuilgoed-sak vol water! 45 Minute later land ek die karp waarvoor ek gekom het en ek is in die sewende hemel - die vis se stert is so groot soos my 6000 baitrunner en weeg oor die 10kg! Vosrite is volop met diè grootte karpe en selfs groter karpe was al hier geland! Na ‘n kort fotosessie swem die vis sterk terug na die diep gate van die Vaalrivier en ek is dankbaar. Verseker sien Vosrite my gou weer in my soeke na groot Vaalrivier karpe!