Visse Is Verseker Nie Vasgemaak Nie

Lesers het sekerlik al die uitdrukking “visse is nie vasgemaak nie” gehoor. Gewoonlik gebeur dit wanneer vis verder langs die oewer uitkom, maar jy en jou penmaat nie vis kry nie en julle mekaar dan met dié gesegde probeer aanmoedig om moed te hou. So hoop ons almal dat die vis wel na ons voerplek toe sal beweeg. Maar visse wat rondswem, kan ook minder positiewe implikasies vir die hengelaar inhou. So gaan hengel ek en Frik toe onlangs op spesiale uitnodiging by ’n privaatdam in die Belfast-distrik in Mpumalanga. Henk Tijssen saam met Henriëtte Lubbe en 'n pragtige karp uit die unieke dam. Ons gashere, Henk en Elly Tijssen, het uit hul pad gegaan om dinge so aangenaam moontlik vir ons te maak en te verseker dat ons wel dié dag die groot karps in dié dam sou kon aantree. Henk het die dag voor ons koms met ’n bootjie en ’n visvinder die dam ondersoek en die grootste konsentrasie karpe op ’n bepaalde kol in 8 meter-diep water aangetref. In voorbereiding op ons koms, het hy ongeveer twee kilogram voer op die plek afgegooi. Ons kon dus die volgende oggend sonder moeite ons stokke met ons beste aaskombinasies op dieselfde plek ingooi…net om nie ’n enkele byt te kry nie! Ons gashere Henk en Elly Tijssen. Skrywer (middel) met een van die karpe waarna daar in die storie verwys word. Teen 13:00 het Henk aangebied om weer ’n draaitjie op die dam met sy visvinder te gaan maak, net om te rapporteer dat die karpe nie meer in dieselfde omgewing as die vorige dag en vroeg die oggend was nie, maar intussen na vlakker water van ongeveer 5 meter diep beweeg het. Toe ons ons stokke optrek, vars aas laai en op die nader afstand ingooi, is ons beloon met ’n pragtige karp van 5,2 kilogram, wat op Pineapple Fluoro, Honey Fluoro en Caller op die voerbal en ’n Banlic-floatie aan die hoek gebyt het. Intussen het daar ’n ysige weste-windjie begin waai en wou geen verdere karp byt nie. Dit het ons aangemoedig om verder navorsing te doen. Weer is die visvinder ingespan, net om aan te toon dat die vis nie meer op die kol van 5 meter-diep was nie maar terugbeweeg het na die dieper water van 8 meter.Naas die heerlike kuier langs die oewer saam met Henk en Elly, was dié dag ook om ander redes vir ons spesiaal. Dit het vir ons ’n besondere geleentheid gebied om visgedrag na te vors en nuttige lesse te leer wat ons graag hier met lesers deel. Ons het eerstens geleer dat ’n bootjie met ’n visvinder baie voordele inhou. Dit is baie opwindend om onder die water te kan “sien” waar die visse is, en dit kan beslis help om te bepaal waar die beste plek is om te hengel. Maar ’n visvinder is nie ’n waarborg dat jy wel vis gevang gaan kry waar die tegnologie vis aantoon nie. Visse beweeg in die winter na dieper water waar die temperatuur meer konstant is maar voer nie noodwendig op hierdie diepte nie. Karpe voer op die bodem, en as die hidrostatiese druk in diep water hoog is, beweeg hulle weg van die bodem nader aan die oppervlak. Selfs die beste aas op die bodem sal dan geen byt oplewer nie. Dit is dus belangrik om met behulp van die visvinder vas te stel presies op watter diepte die vis lê en dan min of meer dieselfde diepte water te soek waar die vis wel op die bodem voer. ’n Tweede les wat ons uit hierdie ervaring geleer het, was dat jy mooi moet dink oor die voorbereiding van ’n voerkol. Jy moet veral in die winter, wanneer karp nie aggressief voer nie, nie té veel grondvoer instuur nie. Dit is dan ook waarom Henk nie die vorige dag baie voer afgegooi het nie. Maar selfs min voer wat op die bodem bly lê -- soos waarskynlik in ons geval waar die karpe nie in 8 meter-diep water op die bodem gevoer het nie – kan suur word en die vis verdryf eerder as nader lok. Meer nog – grondvoer wat wel ingestuur word, moet van goeie gehalte wees, soos byvoorbeeld hempsaad en kaboem-mielies ingemeng in die voer. Nog 'n vis trek die skaal tot oor die 5kg. ’n Laaste les wat ons vir die soveelste keer dié dag geleer het, was dat jy nie moet toelaat dat moeilike hengelomstandighede onnodig jou selfvertroue knou en jou geloof in jou geliefkoosde ase skok nie. Natuurlike faktore soos windrigting, temperatuur, lugdruk en diepte van water - om maar net ’n paar te noem - speel ’n uiters belangrike rol, en kan veroorsaak dat selfs die beste ase op ’n bepaalde dag nie sukses bring nie. Die goue reël is om soveel moontlik oor alle aspekte van oewerhengel uit te vind en jou hengeltegnieke by omstandighede aan te pas. Onthou veral dat visse nie vasgemaak is nie, maar pleks van te wag dat hulle na jou toe kom, gaan soek hulle waar hulle voer en bied vir hulle ’n aaskombinasie aan wat hulle nie kan weerstaan nie!