Vlieërhengel 103

Lees gerus deel 1 Lees gerus deel 2 Deel 3: Om hierdie reeks mee af te sluit verduidelik ek hoe om ’n vlieër teen die wind in te laat vlieg (dit word “tacking” genoem) en ook hoe om jou eie vlieër te bou. Ek begin met hoe om ’n vlieër te ‘tack’. Dit sal afhang van watter tipe vlieër jy het en dit is belangrik om te weet hoe ’n vlieër werk en hoe en met wat hulle gebou word. Ek gebruik drie tipes, die Muller, driehoekige- en vierkantige vlieërs. Mazeppa eiland is die perfekte plek om vlieërs uit te sit. MULLERVLIEËR Diè vlieër is spesifiek gemaak as ’n hengelvlieër en het dus meer verstellings as die ander wat ek gaan bespreek. Dit is goed gemaak met grafietpale met ‘end caps’ op sodat dit nie seer kry indien dit op die rotse sou val. Dit is ook gemaak om op te breek indien dit sou gebeur dat dit dalk in die see val. Dit het sponsies op die vlerke wat dit bo hou en al wat jy doen is om dit in te katrol, sit dit weer aanmekaar en vlieg dit weer uit. Diè vlieër se beste voordeel is dat jy dit baie mooi teen die wind kan instuur weens die stert en die posisie van die middel paal. Die stert en die middel paal kan links of regs skuif wat beteken dat dit dan meer wind weerstand het aan daardie kant en dus in daardie rigting intrek. Soos met enige vlieër wat jy uitstuur maak net baie klein verstellings van so 1mm op ’n slag. As jy dit te vinnig of te veel doen sal jy sien die vlieër staan so skuins in die wind en begin in die rondte tol as jy dit wil inbring – dis die laaste ding wat jy wil hê! Begin klein en sit die vlieër uit en kyk wat dit maak. As jy gemaklik voel met hoe stabiel dit is kan jy dit inbring en nog so 1-2mm skuif. Maar nie meer as dit nie. Wanneer jy mooi gemaklik kan staan en hard trek kan jy die aas aanhaak en die lyn uitvat. Ek moet net weer noem dat dit nie ’n speelding is nie. Dit is deel van jou hengel toerusting. ’n Vlieër bied baie windweerstand so in ’n sterk wind gaan jy al jou dae hê om dit in te bring. Dit is super sterk en het al my van balans af gepluk! Vir matige wind en vir groot aas is diè vlieër ’n moet in my arsenaal. DRIEHOEKIGE VLIEËR Ander tipe vlieërs waarvan ek hou sluit die driehoekige ‘Falcon’ vlieër in. Diè vlieërs gebruik ek die meeste en is vir die meeste toestande wat jy gaan teëkom voldoende. Hulle word gemaak deur Kite Fishing Solutions. Die vlieërs is driehoekig en werk effens anders as die res as dit by sy verstellings kom. As jy die vlieër teen die wind wil instuur moet jy die toue aan die teenoorgestelde kant korter maak. Jy sal gou jou fout agterkom as jy die verkeerde toue korter gemaak het - die vlieër sal landwaarts vlieg en nie seewaarts nie! Dit het nie ’n middel tou soos met ander vlieërs nie, net twee wat van ’n middelpunt af kante toe gaan wat dit minder ideaal vir swaar gewigte dra want jy kan nie sy trekkrag stel nie. Dit is wel baie stabiel in tot baie sterk winde. Besig om ’n driehoek vlieër uit te sit. Let op, jy het geen stert nodig vir die tipe vlieërs nie. Dit word gestel deur een van sy “bridal” toue korter te maak deur tandestokkies, vuurhoutjie stokkies of so iets met ’n gewone wurgknoop in die lyn te bind. Dit klink nou al soos ou nuus maar minder is meer, so een of twee is reg - as jy 3 insit gaan dit dalk te veel wees en dan raak dit in die wind onstabiel. Daar is nog ’n manier om diè tipe vlieër te laat “tack” - bind ’n plastieksak aan een vlerk se punt. Die weerstand wat die sak bied trek ook die vlieër in die rigting van die wind. Vir diè vlieërs het jy nie sterte nodig nie wat ’n groot voordeel is as jy nie baie spasie het om jou vlieër op te stuur nie. Hulle is baie stabiel en is in 2.1m en 2.8m groottes beskikbaar. Die groter een werk baie goed in die oggende as daar ’n ligte wind is, en die kleiner een werk beter in die dag as die wind sterker begin waai. Al kan die trekkrag nie gestel word nie kan hulle steeds groot aas uitvat as die wind lekker sterk is, en is dan ook die maklikste om in te bring van al die soorte vlieërs. VIERKANTIGE VLIEËRS In diè klas bespreek ek kommersiële modelle asook diè wat ek self maak. Kite Fishing Solutions maak baie mooi vierkantige vlieërs van klein 50cm outjies tot groot 1m menere. Die voordele van die vlieërs is dat die kleineres ideaal is om in baie sterk wind te gebruik as geen ander vlieër sal werk nie. Die ander vlieërs wat ek bespreek het kan tot en met so 45kmp wind gevlieg word, maar as dit nader aan 60kmp is kom die klein 50cm vierkantige vlieërs tot hulle reg. Hulle is verbasend maklik om in sterk wind in te katrol. Die nadeel egter is dat jy ’n baie lang stert nodig het om dit in die wind stabiel te hou – sonder so ’n stert rol dit net rond. Ek maak die sterte so 20m lank en gebruik uiesakkies daarvoor. Al word so ’n sakkie nat word dit dadelik droog soos dit opgaan. Met hierdie tipe vlieër kan jy die trek krag stel deur die middel tou langer of korter te maak, en sy rigting deur die kant toue korter of langer, links of regs te maak. TUISGEMAAKTE VLIEËRS Vlieërs is maklik om te maak en werk nes die gekoopte vierkantige vlieërs. Hulle word verstel op dieselfde manier en jy verloor nie honderde rande as hulle in die see val of skeur nie! Plak “duct tape” om die kante, dit help dat die vlieër nie rek en skeef trek nie. Ons gebruik 8 of 10mm houtstokkies as ons selfgemaakte vlieërs bou en 80 grein dak plastiek. Vir my tuisgemaakte vlieërs gebruik ek hout stokkies of grafiet pale en dak plastiek. Ek meet die grootte uit en sny die vorm uit die dak plastiek. Om hulle te versterk plak ek ‘Duck tape’ om die rante. Ek het ook so ’n paar van hulle uit tent seil laat maak. Hulle is baie lig en vlieg baie mooi, selfs winde tot 60kmph maak hulle niks. Ek gebruik ’n harde ronde plastiek disket waarin ek 6 of 8mm 90 grade gate regdeur boor. Die pale wat ek verkies is soliede grafiet pale wat dan in die gate gedruk word tot by die middel punt. Aan die kop gebruik ek van Muller se ‘End Caps’ wat die seil teen die pale beskerm sou dit val. Wat jy nodig het om jou eie vierkantige vlieër te bou: Dak plastiek (60 tot 80 microns)Duck tapeMullers ‘End caps’ (opsioneel)6 tot 10mm hout stokkies of 6 of 8mm grafietstokkeDacron of skoenmaker tou2 Groot swivels vir middelpunt en stert4-rigting gaskonnekteerder, ronde plastiek disket of net pale wat lank genoeg is om kant tot kant te raak. Eerstens bou jy die vlieër se lyf – dak plastiek (waarmee huise se dakke waterdig gemaak word) is goedkoop asook duursaam Ek gebruik 60 mikron – nie te dik nie en baie sterk. Dit moet 100% vierkantig gesny word. Ek het ’n karton patroon wat presies 50cm by 50cm is. Ek plaas dit op die plastiek, merk met ’n permanente merker en sny die vierkant versigtig uit. Om te keer dat die rante van die plastiek skeur of rek plak ek ducktape reg rondom die vlieër en plak meer lae op die hoeke en gebruik ook ‘end caps’ vir ekstra sterkte want dis hulle wat die meeste die grond slaan. Die stokke druk jy dan in die ‘end caps’ in en dit hou die vlieër mooi vierkantig. Dit hou baie langer so en die vlieër kan dan ook opgevou word vir maklike vervoer see toe. As jy die vlieër opvoubaar wil hê moet dit natuurlik in die middel kan vou. Vir die doel gebruik ek 4-rigting gas konnekteerders of ’n plastiese disk. Die pale druk dus in die ‘end caps’ aan die punte, en in die 4-rigting gas konnekteerder in die middel. As so iets nie beskikbaar is nie, plaas die pale van punt tot punt. Dit maak nie saak nie maar dan sal die vlieër maar net heel moet bly. ’n Veilige plek om dit in te vervoer is tussen jou visboks en aaskas, of tussen die aaskas en jou rugsak. Ons gebruik die plastiese "disk" wat help dat ons die vlieërs maklik kan opvou. Nou vir die toue waarmee die vlieër gestuur en beheer word. Eerstens, en die mees belangrikste, is om die middelpunt se tou in te sit. Bind dit om die 4-rigting gas konnekteerder vas, of om die twee pale, of aan die splitpin in die middel van die plastiese disk. ’n Splitpin kan ook deur die middel van die hout pale ingesit word en dit as die middelpunt gebruik word waaraan die tou vasgemaak word. Maak ’n klein gaatjie deur die plastiek en trek die dacron deur. ’n Goeie maatstaf vir die regte lengte van die tou is vanaf die middel van die vlieër tot reguit op aan die bo-kant van die vlieër. As jy die lengte langer of korter maak gaan die vlieër hoër of laer vlieg. As die knoop gemaak is moet dit presies aan al die platkante raak, dan weet jy jou vlieër is 100% vierkantig. Lig nou die vlieër met die tou op en kyk wat is die swaarste deel. As dit natuurlik na een kant toe hang is dit jou onderkant. Gebruik die bo-kant om die ander twee toue aan vas te bind. Dit is jou ‘bridal’ toue. Al drie die toue moet aan die groot swivel vasgebind word. Die twee kant toue moet presies tot in die middelpunt kom as die knoop klaar gemaak is. Dit vat so ’n bietjie oefening maar die regte lengte sal gou gekry word. ’n Makliker manier is om die toue net deur die swivel te laat hardloop wat dit dan baie maklik maak om dit te verstel. As die toue nie gelyk is nie gaan die vlieër in die rondte swaai en nooit reg vlieg nie. Dit is die toue wat gebruik gaan word om dit links of regs in die wind in te laat vlieg. Aan die onderkant plaas jy dan nog twee dacron toue. Dit is waar jy die uiesakkie tou aan gaan vasbind, naamlik die stert wat ek gewoonlik so 20m lank maak. As alles reg en volgens skaal gebou is gaan die vlieër met sy eerste probeerslag opgaan. As jou mates effens af is sal jy dit gou sien want die vlieër sal van kant tot kant swaai of in die rondte swaai. Wanneer dit gebeur is dit of nie 100% vierkantig nie of die toue is nie ewe lank nie. Maak dit reg en dit sal werk. Onthou net om die vlieër 100% vierkantig te sny en stel die vlieër baie klein bietjies op ’n slag. Kontak * Vir enige inligting oor vlieërhengel of enige ander aspek van groothaai-hengel kan skrywer gekontak word. E-pos: nevillebarnard89@yahoo.com; Tel. 082 743 4574.