Vlieghengel is Opwindend – 5

Deel 5 - 3 Vlieë vir Babers! Indien jy DEEL 1 of DEEL 2 of DEEL 3 of DEEL 4 gemis het, volg die skakels. Dit is vroeg in die oggend op ‘n warm lentedag; ek staan vasgenael in kniediep water met opgehoue asem en wag dat die baber nader kom. Van ver af het ek hom reeds gesien, met snorbaarde bo die watervlak kom hy soos ‘n slang met kronkelbewegings aangeswem! Ek sak af op een knie om minder sigbaar te wees en toe hy so tien treë van my af is, skiet ek die pouveervlieg uit. Die vlieg val voor hom en effens links, die volgende oomblik hap hy twee, drie keer na die vlieg. Sy kop is halfpad uit die water en ek hoor hoe klap sy kake. Ek tel die vlieg vinnig op en ek skiet dit weer uit. Met ‘n swaaibeweging gryp die ou grote die gogga wat so moedswillig is. Ek tel die vliegstok vinnig op en gee nog so ‘n pluk of wat om seker te maak die vlieg haak goed. Die water spat en met ‘n modderwolk trek snorre weg, die water kolk eintlik so kragtig werk sy stert om pad te gee! Dit is hengel met die vliegstok! Die baber kom algemeen voor in die meeste van ons riviere en damme. Hierdie vis is ‘n jagter by uitstek, onthou dit en jy gaan sommer baie makliker vir hierdie vegters hengel. Dikwels kan jy sommer duidelik sien waar die babers baljaar. Hulle kom op en draai dan met ‘n kolkbeweging en die kenmerkende bloemps geluid op die oppervlak. Ander kere moet jy hulle soek. Kyk veral in sloepe by damme aangesien hulle graag daar jag. Die sloepe het gewoonlik watergras, biesies, riete of klippe waar die baber se kos aangetref word. Stap baie stadig en versigtig, min of meer soos ‘n plaaswerker op pad werk toe op ‘n Maandagoggend (J). Babers is baie gevoelig vir trillings en harde geluide. In riviere is daar gewoonlik baie wegkruipplekke vir die vissies, krappe en paddas wat deel van die baber se voedsel uitmaak. Soek hulle onder bome en langs rietbosse, veral die waarin daar voëlneste is. Gebruik ‘n goeie donkerbril om die weerkaatsing op die water minder te maak. Jy kan dan baie beter in die water in sien. ‘n Hoed help ook baie om die lig uit jou oë te hou. Onthou, ‘n pet is nie ‘n hoed nie. Later jare gaan jy bly wees dat jy jou gesig, nek en ore ten volle beskerm het! Kyk baie mooi in die water want soms lê ta sommer hier vlak voor jou, doodstil en wag vir kos om verby te kom. Ek gebruik hoofsaaklik drie babervlieë: ‘n Engelbrecht loodkoppie (met ‘n baie klein loodjie), ‘n takbokhaar caddisvlieg (wat bo dryf) en ‘n pouveervlieg. Ek maak baie gebruik van die “roepmetode” waar ek die vlieg verskeie kere op dieselfde plek gooi. Hiervoor gebruik ek die klein loodkoppie. Gooi die loodkoppie op plekke waar jy ‘n baber gesien draai het of naby skuilplekke waar jy ‘n baber verwag. Ek gooi so drie of vier keer op dieselfde plek voor ek die loodkoppie laat sak. Hou die punt van jou dryflyn nou goed dop. Gewoonlik gryp die baber die loodkoppie met die sak slag, dan sien jy sommer dadelik hoe die beweging van die dryflyn verander. Moet egter nie aanhoudend op dieselfde plek gooi nie - as daar ‘n baber naby is, sal jy dit gou sien. Indien hy nie die vlieg gryp nie sien jy dikwels ‘n kolkbeweging soos hy die vlieg gemis het. Wanneer dit gebeur kan jy die vlieg gou weer daar gooi en dadelik laat sink. Hierdie metode werk uitstekend onder bome by damme waar daar watervoëls in sit. Stap baie versigtig nader, jy sal sien dat meeste van die voëls in die water mis wanneer hulle wegvlieg. As jy mooi kyk sal jy sien dat die babers hierdie mis gulsig opraap. Werk nou naby die boomstam met jou loodkop en jy is feitlik verseker van ‘n baber of twee. Onder hierdie bome vang jy gewoonlik groot babers. So het my broer Marius op sy eerste uitstappie na een van my gereelde boomhengelplekke drie lynbrekers na mekaar gevang! My dogter, Jané was nog in die laerskool toe ek en sy eendag by ‘n plaat bome kom waarin die wit reiers broei. Ek het die boot geanker en ons het die skouspel deur die verkykers gade geslaan. Ek merk toe op dat wanneer die groter kuikens soms net bo die opper-vlak van tak tot tak spring, die babers onder die takke draai. ‘n Onverskillige kuiken het in die water geval en na die volgende boom gespartel. Meteens verskyn daar ‘n string baberkoppe op die oppervlak, al agter die kuiken aan! Ek het gou die pouveervlieg aangebind en die vliegstok vir Jané gegee. Skaars het die vlieg neergeplons of die lyn sny deur die water. Toe was daar totale wanorde – oral raas en vlieg daar reiers, babers swem in alle rigtings weg, die vlieglyn sny Jané se hand en ek probeer raad gee tussen alles deur. Hierdie baber het sy vryheid herwin deur tussen die boomtakke in te swem en die lyn af te breek. Daarna het Jané darem nog twee gevang en uitgebring. My arme dogter was aan die diepkant ingegooi, maar soms is dit die maklikste manier om te leer! Ek het die pouveervlieg ontwerp om so veel van die baberkosse moontlik na te boots. Wanneer hierdie vlieg op verskillende maniere gehengel word stel dit die volgende voor: ‘n vissie, ‘n skooltjie vissies, ‘n voëltjie, ‘n padda of ‘n krap. Ek het reeds ongelooflike sukses met hierdie vlieg gehad want dit het baie beweging in die water, dit verplaas baie water en lyk groot in die water. Eendag by die Vaalrivier sien ek ‘n baber se stert bo die water uitsteek. Ek het die pouveervlieg stroomop van die baber gegooi en die lyn dopgehou. Toe die lyn tot stilstand kom het ek die lyn met my hand gepluk en die stok opgetel. Die baber het half uit die water gespring en koers stroom op gekies. Hierdie baber het die skaal op 37-pond getrek, en terwyl ek met die ou gespook het, het my hengelmaat skaars tien treë verder ses babers met die pouveer gevang! Op ‘n windstil somersaand broei daar soms ‘n mag der menigte caddismotte in ‘n rivier uit. Dan kan jy een van die wonderlikste hengelervarings van jou lewe geniet. Hierdie gebeurtenis vind gewoonlik plaas net voor donker. Wees dus gereed want jy het nie baie tyd nie. Een oomblik is die water nog stil en die volgende oomblik sien jy net baberkoppe. Die babers lê met hulle koppe stroomop en vang die motte. Soms jaag hulle selfs die motte. Onder hierdie omstandighede gebruik ek die takbokhaar caddis. Nou is jou vlieg plasing van uiterste belang. Aangesien daar so baie motte uitbroei en die water boonop vloei, moet jy die vlieg reg voor die baber se bek gooi. Hoe nader hoe beter! Elke keer wat jy dit regkry sal jy met ‘n baber beloon word. Onthou om ‘n flitsie saam te neem want jy gaan verseker vliegies moet vervang. Dit is nie snaaks om verskeie kere afgebreek te word nie! Dit bly vir my ongelooflik dat sulke groot babers sulke klein motjies vreet. Die baber is ‘n roofvis wat jou vlieg gretig sal gryp. Omdat babers baie groot word kan jy een of ander tyd ‘n heerlike geveg op die lyf loop. Onthou, die tyd van spog met ‘n klomp dooie vis is lankal verby. Plaas asseblief alle vis wat jy nie self wil gebruik nie, ongedeerd terug. Ons water- en vi-bronne word ernstig bedreig, help ons om hierdie onvervangbare erfenis te bewaar. Bindpatrone: Swart loodkop Neem ‘n langsteelhoek en maak dit warm oor ‘n oop vlam. Buig een derde van die hoek, aan die ogie se kant, 90%. Maak ‘n knyploodjie oop en druk dit met ‘n tang om die opgebuigde steel vas. Daar is natuurlik ook ‘n ander uitweg: uiteindelik is daar “kaal” loodkoppies met sterk hoeke in die handel beskikbaar. Neem die loodkoppie en druk die loodjie in swart glansverf. Laat die verf goed droog word. Neem nou ‘n ronde stukkie hout of iets dergeliks en druk die punt in wit glansverf. Druk nou versigtig 2 ogies op jou loodkoppie. Bind rooi marabou of wol in vir die stertjie. Bind 3 swart nek- of saalvere van ‘n hoender net agter die loodjie in. Draai die vere een vir een om die hoeksteel tot by die stertjie. Wanneer jy met die 2de veer begin, moet jy dit met ‘n slingerbeweging inbind om te verhoed dat jy die vorige veer vasvang en plat druk. Bind die vere af en siedaar: jy het een van die beste kunsase ooit! Takbokhaarvlieg Hoek: 8 - 12Lyf: wit wol of mylarSkede: mylarOndervlerk: wit hoë digtheid spons (verpakkingsmateriaal)Vlerk: wit takbokhaar Pouveervlieg Hoek: 4 – 8Stert: rooi marabou of –wolLyf: swart marabou en pouveer Bind die pouvere in sodat dit in ‘n waaier om die hoek staan. Dit is die belangrikste kenmerk van hierdie vlieg. Wanneer jy hom beweeg in die water gaan die pouvere toe en weer oop vou. Hierdie beweging in die water maak die vlieg baie sigbaar en “lewendig”. Gewapen met hierdie 3 vlieë kan jy babers onder feitlik alle omstandighede vang. * Hierdie reeks word elke week gepubliseer. Maak seker jy mis nie een nie – sluit nou aan by www.foranglers.co.za – daar is verskeie opsies om elke sak te pas.