Vlieghengel is Opwindend – 8

‘n Liefde Vir Forel Ek gebruik die vliegstok vandag vir feitlik al my hengel maar, snaaks genoeg, dit is steeds forelhengel wat ‘n gevoel van die misterieuse in my wakker maak. Die vliegstok is per slot van sake ontwerp met net hierdie spesie in gedagte! Wanneer ek aan forelhengel dink kom daar menige wonderlike herinnerings by my op! Ek onthou die 21 forelle wat ek gedurende ‘n naweek by Elandskloof gevang het, met ‘n vlieg wat ek uit Prof. Ben Engelbrecht se boek gebind het. Later jare het ek besef dat ek dié vlieg heeltemal verkeerd gebind het. Tog was dit die eerste tuisgemaakte vlieg wat goeie resultate gelewer het! Daar is die dubbelsyfer reënboogforel wat ek op ‘n aaklige koue dag op ‘n pouveerbabervlieg gevang het! Na ‘n hele oggend se gesukkel het ek dié vlieg uit skone desperaatheid probeer. Helder voor my sien ek nog vir my dogter, Jané met haar eerste forel by Dullstroomdam en die groot opgewondenheid wat daar geheers het. Ek dink aan die klomp groot forelle wat Marius by ‘n klein inlopie, op ‘n droë vlieg gevang het; soms het ‘n vis sommer so boog water veroorsaak soos die vlieg gejaag is. Met weëmoed herleef ek die dag toe my ou moeder langs een van Theo se damme op ‘n stoel gesit en die een vis na die ander op ‘n naaldekoker larwe gevang het. Dit was ons laaste hengeluitstappie saam! Kan ek ooit die groot forel by Trout Hideaway vergeet wat Eddie met ‘n leë kamera “afgeneem” het! So kan ek aangaan vir verskeie bladsye, maar jy kry mos nou die idee. Hengelaars is vandag in die gunstige posisie om te kan kies en keur wat forelhengelplekke aan betref. Daar is letterlik honderde damme om uit te kies, van klein plassies water tot damme wat hektare beslaan. Hierdie damme word oor die algemeen van vis voorsien wat uit ‘n telery kom. Wanneer hierdie metode wetenskaplik toegepas word lewer dit uitstekende hengel op. Vermy liewer die damme waar jy gooi na gooi dieselfde grootte vis vang! Normaalweg daag hengelaars by ‘n dam op, sit sy/haar gunsteling vlieg aan, gooi die vlieg so ver as moontlik uit en begin die vlieg intrek. As jy ‘n bietjie meer inisiatief aan die dag lê gaan jy baie meer sukses behaal. Wanneer jy by die dam aankom is dit ‘n goeie plan om eers ‘n bietjie te kyk wat om jou aan gaan. Eerstens sal jy natuurlik kyk of daar enige beweging van vis op die water is. Indien wel, moet jy probeer vasstel wat die vis vreet. Kyk ook of jy kan sien waar die vis die insekte vat, onder die oppervlak of op die oppervlak. Soms is dit maklik om te sien want die visse swem sommer, met bekke wat oop en toe gaan, halflyf uit die water. Indien daar geen beweging is nie, kan jy langs die kante van die dam kyk om ‘n idee te vorm van watter insekte of ander kos vir die vis beskikbaar is. Soek teen klippe, stompe en ander strukture na die doppe (droë skedes) van naaldekokerlarwes. Dalk is jy gelukkig om eendag te sien hoe die naaldekoker uit die larwevorm breek. Kyk ook in die vlak water of daar enige lewe is, miskien is daar klein vissies of paddavissies wat jy kan naboots. Indien jy ‘n fyn net het, kan jy dit tussen die watergras deurtrek en kyk watter goggas daar skuil. Jy kan ook ‘n bondel watergras neem en dit buite die water bekyk. Laastens kan jy ‘n paar klippe omkeer en onder en aan die klippe kyk wat daar wegkruip. Gewapen met hierdie kennis kan jy nou ‘n meer logiese besluit neem om te bepaal watter vlieg aan jou lyn moet kom. Forelvliegies kan rofweg in twee groepe opgedeel word: droë vliegies en nat vliegies. Eersgenoemde dryf op die water, terwyl laasgenoemde onder die water gehengel word. In hierdie aflewering gaan ek op damhengel konsentreer. Die mees suksesvolle droë vlieg vir damhengel is ongetwyfeld die DDD. Hierdie vlieg, wat sy ontstaan in die Dargle omgewing van Natal gehad het, stel ‘n algemene insek voor wat in die water geval het. Die beste voorbeeld van hierdie vlieg word met klipspringerhaar gebind. Jy kan hierdie vlieg net uitgooi in die omgewing van die aktiwiteit en dit laat rond dryf. Die forel vat hierdie vlieg gewoonlik met ‘n gespat van water, so natuurlik lyk dit. Gooi hierdie vlieg hard en hoog uit sodat daar ‘n plukbeweging in die lyn is voor die vlieg op die water land. Amper asof jy nie genoeg lyn afgetrek het nie. Dit veroorsaak kinkels in die lyn wanneer dit op die water val en dit laat jou vlieg meer natuurlik dryf. Maak seker dat jy nie die stok optel voor die vis met die vlieg gedraai het nie. Sodoende verseker jy dat jy nie die vlieg uit sy bek trek nie. Die volgende droë vlieg wat ek baie gebruik is ‘n Muddler Minnow. Hierdie vlieg sit meer ín die oppervlak as óp die oppervlak en is dodelik in die somermaande wanneer sprinkane in die water val. ‘n Sprinkaan val met ‘n spat in die water, gooi jou Muddler ook so om die nodige aandag te trek. Op ‘n winderige dag gebeur dit dikwels dat sprinkane in die water val, maar dan sien mens dit nie so maklik nie as gevolg van die golfies. Kyk daarom liewer of jy dalk stil kolle in die water sien wat veroorsaak word deur ‘n vis wat net onder die oppervlak draai. Jy kan die Muddler ook met stadige bewegings intrek – nou is hierdie vlieg op sy gevaarlikste! Daar is natuurlik baie ander droë vlieë beskikbaar maar hierdie twee gaan die meeste werk vir jou doen. Kom ons kyk nou na die verskillende kossoorte wat jy langs die dam gesien het en dan probeer ons dit naboots. Een van die gewildste kosse is die naaldekokerlarwe. Dit kan met ‘n Dragonfly Nymph nageboots word. Hierdie vlieg lyk baie natuurlik in die water en om dit meer natuurlik te laat lyk moet jy dit met stadige, kort trekkies inbring. Laat die vlieg ‘n bietjie rus na elke vier of vyf trekke. Hengel hierdie vlieg veral in vlak water waar watergrasbeddings voor kom. Gebruik dit ook naby boomstamme, rotse en ander struktuur. Klein vissies kan met ‘n Muddler Minnow, wat yl gebind is, nageboots word. Gooi hierdie vlieg veral langs die kant van die dam af want dit is waar die klein vissies skuil. Die Muddler word nou met langer, vinniger hale ingetrek. Dink net aan die manier waarop ‘n klein vissie swem. Die forel gryp die vlieg gewoonlik baie hard, wees dus versigtig met die optel van die stok anders breek jou voorslag met die optelslag. Hierdie vlieg het persentasiegewys vir die meeste groot forel in die wêreld gesorg. Dikwels is daar honderde paddavissies in die vlak water. Hulle word gulsig deur enige forel opgeraap die oomblik wat hulle die veiligheid van die vlak water ver-laat. Die Taddy is ‘n goeie vlieg om in hierdie geval te gebruik en is ook een van die maklikste vliegies om te bind. Hengel die Taddy met kort stadige trekkies. Ek onthou nog goed hoe ek en broer Derek eendag in die hoek van dam 13, by Elandskloof, ‘n spul forel met die Taddy gevang het. Die regte vlieg op die regte tyd en forelhengel word maklik. Onder die klippe kry ons dikwels ‘n verskeidenheid larwes, veral van die watermot en die eendagsvlieg. Die Gold-Ribbed-Hare’s-Ear-Nymph of GRHEN is ‘n ideale keuse om hierdie larwes na te maak. Hierdie vliegie moet jy stadig met kort gelykmatige trekkies inbring. Soms vind hengelaars dit moeilik om te glo dat so ‘n klein vliegie enige aandag kan trek in die water. Kyk gerus eendag, wanneer jy ‘n forel slag vir die ontbyttafel, na die maaginhoud van die vis. Gooi ‘n bietjie water in ‘n wit piering, sny die magie oop en druk die inhoud in die piering uit. Aanvanklik sal dit lyk na ‘n bietjie vuil modder. Roer die “modder”met jou vinger en jy sal verbaas wees om te sien hoeveel klein goggatjies daar in so forel se maag is. Ek het gevind dat ek baie meer sukses begin behaal het, toe ek kleiner en stadiger begin gaan het - kleiner vliegies en ‘n stadiger intrek. Met hierdie enkele vliegies kan jy forelwater toe gaan en jy sal ‘n goeie kans staan om vis te vang. Iemand het gesê dat vliegies meer hengelaars vang as visse! Wanneer jy in ‘n goeie hengelwinkel kom, gaan jy verdwaal voel wanneer jy die duisende vliegies sien. Op hierdie stadium begin baie hengelaars die vliegies uitsoek wat vir hulle mooi lyk – klaar gevang! Roep liewer die winkelassistent nader, vertel hom waar jy wil gaan hengel en vra watter vliegies hulle aanbeveel. Vra ook of hy vir jou kan sê hoe elke vliegie ingetrek behoort te word. Hier kan jy ook eerstehandse inligting kry oor hengelplekke wat ‘n besoek werd is.