Vlieghengel – So Gooi Jy!

Deel 4: So Leer Jy Om Met Vlieggerei Te Gooi Indien jy DEEL 1 of DEEL 2 of DEEL 3 gemis het, volg die skakels. Ek neem aan dat jy nou die trotse eienaar is van ‘n vliegstok, katrol en lyn! Nou moet jy al die dele bymekaar voeg! Kom ons begin met die stok. Wanneer jy die verskillende dele in mekaar druk, is dit ‘n goeie gewoonte om byewas ligweg aan die indrukpunte te smeer. Dit sal verhoed dat die dele vassit wanneer jy die stok weer uitmekaar wil haal. Indien jy nie byewas byderhand het nie, kan jy die punt langs jou neus vryf. Dié bietjie olierigheid is voldoende om die lasstukke maklik te laat los kom. Indien ‘n stok se dele wel vassit kan jy dit as volg uittrek: hou die stok agter jou bene vas met jou hande weerskante van die lasstuk, gebruik nou jou bene en jou hande om die las los te trek. Moenie ‘n draaibeweging gebruik nie! Indien die dele kwaai vassit gaan jy jou stok breek! Begin met die boonste gedeelte van die stok – soos jy die onderste dele dan in mekaar steek verhoed dit dat die heel onderste handvatsel die grond raak, en so hou jy dit skoon. Nou kan die katrol aan die stok gesit word. Draai die ringe wat die katrol vashou, stewig vas. Aangesien jy die stok baie gaan hanteer deur die loop van die dag, werk die ringe los as dit nie goed vas is nie. Hoewel die Amerikaners die katrol met hulle “swakker” hand hanteer is die aanvaarde metode in Suid-Afrika om die handvatsel na jou “sterk” hand te laat wys. Trek net genoeg lyn af om deur die ogies te kan gaan, en vou dit dubbel so as jy dit per ongeluk mis vat sal dit nie weer agtertoe val nie. Trek so vyf meter lyn voor by die punt van die stok uit en laat dit reguit voor jou op die gras lê. Maak seker dat daar vir ten minste 20m niks agter jou is nie. Vat jou stok stewig vas met jou duim bo op die stok. Verbeel jou nou dat daar ‘n groot horlosie regs van jou staan - 12 uur is by jou kop en sesuur by jou voete. Jy gaan die stok tussen 10 uur en 1 uur beweeg. Om met ‘n vliegstok te gooi verg nie krag nie. Hou die lyn met jou hand teen die stok vas, jou swak hand gaan vir eers nie werk nie. Tel nou met ‘n vinnige beweging die stok op en stop die stok agter jou kop op die 1 uur posisie. Jy moet eerder probeer om die lyn op as agtertoe te gooi. Indien jy hierdie beweging reg doen, sal die lyn in ‘n lusvorm bo-oor die stokpunt uit skiet. Dit is uiters belangrik dat jy die stok stop! Dit gee die lus in die lyn kans om uit te rol. As jy die stok nie stop nie, gaan jy die lyn se energie verloor. Omdat daar ‘n lus in die lyn is gaan die energie gebruik word om die lus reguit te maak, terwyl jy eintlik die energie wil gebruik om die lyn vorentoe te skiet. Wanneer moet jy die vorentoe beweging begin? Maklik - wanneer die lus heeltemal uitgerol het. Baie hengelaars kyk oor hul skouer om dit te sien, maar jy sal gou voel daar is ‘n baie ligte plukkie aan jou lyn wanneer dit heeltemal uitgeloop het. Nou moet jy die stok vorentoe beweeg tot op 10 uur sodat die lus weer kan uitrol. Nou kan jy gelukkig sien wat gebeur! Dit is belangrik om jou gewrig te sluit en jou elmboog af en naby jou lyf te hou. Indien jy heeltyd jou elmboog hoog lig gaan jy na ‘n paar uur lekker moeg en seer word. Onthou ook om die stok regop te hou. Wanneer jy die agtertoe – en vorentoe bewegings reg kan doen, gaan jy oor na die volgende stap. Herhaal nou beide bewegings ‘n paar keer aaneen en probeer om die vlieglyn voor en agter in die lug te hou. Indien jy suksesvol is kan jy die lyn na ‘n paar beweging voor jou uitskiet. Weer eens moet jou stok op 10 uur stop. Om meer lyn uit te skiet moet die ander hand nou ook begin werk. Trek eers meer lyn van die katrol af en laat dit voor jou op die grond lê. Hierdie hand gaan nou die lyn vashou en nie meer die stokhand nie. Hou die lyn laag vas, ongeveer naby jou linker broeksak. Om meer lyn in die lug te kry, moet jy tydens die vorentoe beweging elke keer bietjie lyn deur jou hand laat gly. Wanneer jy voel daar is genoeg lyn in die lug kan jy die lyn finaal vorentoe uitskiet. Indien jy genoeg lynspoed opgebou het, gaan die lyn wat in die lug is genoeg energie hê om, wanneer jou lynhand die lyn los, nog meer lyn van die grond af uit te skiet. Onthou asseblief dat ek alles hier so eenvoudig as moontlik hou, sodat die beginner gou kan leer om ‘n vlieg in die water te kry. Volgende week begin ek met praktiese vlieghengel – intussen oefen die gooislag, oor en oor! NOTA: Illustrasies met erkenning aan: The New Encyclopedia of Fishing. * Maak seker jy mis nie een nie – sluit nou aan by www.foranglers.co.za – daar is verskeie opsies om elke sak te pas.