Waarom Buig My Hoeke Oop? – Drie Topwenke Om Dit Te Verhoed

Talle hengelaars het al ervaar dat die katrol wegtrek met ’n groot gejuig, die hoek word geset maar sekondes later is die vis af – en dit kon jou volgende PB gewees het! Met nadere inspeksie sien jy dat die hoek oopgebuig is, die rede hoekom die vis weg is. Hoekom gebeur dit?Eerste ding wat jy doen is om al die blaam op die hoek te plaas; en dan belowe jy jouself dat jy nooit weer daardie tipe hoeke sal aanskaf nie..! Maar - wat as dit bloot onkunde is oor wat jy as hengelaar anders kon doen om te verhoed dat dit gebeur? Hier verskaf Werner Lubbe kundige inligting om dit te verhoed. Die eerste belangrike punt om te verstaan is Balans:Aanbieding van aas is belangrik en om ’n floatie, degie, wurm of selfs ’n pit aan te bied dat dit natuurlik voorkom in die water, verhoog jou kanse om ’n vis te vang. Ten einde dit te doen, moet die hoek so lig moontlik wees en die hoeklyn soepel. Vis soos karp en moddervis wei meestal al om die voerbol en suig die kos soos ’n stofsuier in en blaas weer uit. Daarom is dit belangrik dat die strop nie te swaar moet wees nie. Die ligter hoek in die mark, soos Daiichi, Fear None, Ryoichi, BAT en so meer, is almal so lig as moontlik gemaak om ’n natuurlike aanbieding te verkry, deur die omtrek van die draad te verminder. ’n Dunner draad lewer ook ’n skerper punt en beter penetrasie. Maar, daar is ’n beperking - jy kan nie ’n 3kg karp met ’n #1 hoek en 20lb lyn bo-op die water sleep nie. Alles moet in balans wees - die hoekgrootte tot tipe aas, die hoekgrootte tot hoeklyndikte, die hoekgrootte tot teikenvis en so meer! Hier is drie topwenke: 1 - Maak jou hoeklyn die swakste skakel in die strop!Dit klink effens teenstrydig, maar hier is baie waarde in. Een van die eerste en seker die mees algemene foute is dat die lynsterkte die dikte van die hoek oorskry. Wat daarby bedoel word is dat indien jy met ’n baie hoë breekkrag lyn hengel (en veral braid) gaan iets eenvoudig moet meegee, en in meeste gevalle is dit ongelukkig die hoek. Om te vermy dat jou #0.5 - #1 hoek oopbuig, gaan jy moet afskaal met jou lyn se breekkrag om te verseker dat die hoek en die lyn saamwerk in plaas daarvan dat hulle teen mekaar werk. Hierdie wenk is ook handig wanneer jy weer jou gunsteling hengelwinkel besoek en klaargemaakte stroppe aankoop - van hulle word met braid hoeklyne gemaak. Vir hierdie rede verkies toernooihengelaars om hulle eie stroppe te maak sodat hulle beheer het waarmee hulle hengel, en dit is ook die rede dat hulle selde die 5 tot 10-pond hoeklyn breekkrag oorskry as hulle met klein hoeke hengel. Uit ’n visveiligheid oogpunt maak dit ook sin dat slegs die hoeklyn breek sou die sinker of skaglyn iewers vashaak met ’n vis aan. Indien die hengel toestande van so ’n aard is dat jy wel jou lyn se breekkrag moet verhoog, is dit altyd ’n goeie idee om jou hoekgrootte ook aan te pas. Daar is wel plek vir braid hoeklyne, soos in spesiehengel, waar dit in samewerking met ’n veilige strop en heelwat dikker en swaarder hoeke gebind word. 2 - Verkort die totale stroplengte!Hierdie is seker die grootste oorsaak dat hoeke oopbuig - die totale stroplengte is net te lank, en die tweede hoek haak in die vis se stert as dit draai, en sodra die lyf reguit gemaak word ontwikkel dit enorme krag, en iets moet dan meegee. In die meeste gevalle haak die tweede hoek in die vin of aan die skub en penetreer nie behoorlik nie. Die krag werk dan op die punt van die hoek en dit buig oop. Terselfdetyd skeur die ander hoek dan uit die bek, en ons dink die vis het die hoek oopgebuig - maar dit is nie waar nie. Die oopgebuigde hoek kom van die stert, vin of skub af. Dit kom voor by beide Rietvlei- en Vaaldamstroppe, en die kritiese parameter om na te kyk is die maksimum afstand van hoek tot hoek. ’n Goeie gehalte karp van so 3kg tot 4kg is ongeveer 650-800mm lank. Wanneer die vis draai, verkort dit die lengte van bek tot stert na ongeveer 500mm. As die hoeke dan 500mm tot 600mm van mekaar af is, en die tweede hoek haak in die stert, is daar tot 300mm se reguitmaakkrag wat ontwikkel word. Die antwoord lê weereens in die balans. Indien langer hoeklyne vereis word - soos vir ’n sagter bodem - maak dan die skaglyn korter om die totale lengte op minder as 500mm te kry. Dit sal verhoed dat die tweede hoek by die stert uitkom. Die antwoord by ’n Vaaldamstrop is óf ’n baie kort strop, óf die gebruik van gummiestops, en ’n lang skaglyn van tot 800mm. Sou die tweede hoek die stert haak, en die vis sy lyf reguit maak, dan skuif die gummiestop bloot en niks breek nie. Ja, die geveg sal erger wees, want nou kom die vis soos ’n boeksak in. Hier is 'n voorbeeld van hoe dit lyk indien vis in die mond asook die lyf gehaak word. Gelukkig was die vryhangende hoek in die lyf van die vis gehaak en nie laer af in die stert gedeelte nie, anders was die kans baie groot dat hierdie net 'n foto van 'n leë strop sou wees met geen teken van 'n vis nie. Die meegaande skets wys hoe hoeklyn lengtes kan veroorsaak dat die vryhangende hoek die vis in die lyf haak. Hier kan jy duidelik sien dat hoe langer die hoeklyne is, hoe langer dit die lengte maak van die strop in geheel van hoek tot hoek, veral op die gewilde Glyrietvleistrop. Dus verhoog dit dan die moontlikheid dat groter vis in die lyf gehaak kan word, en hoe groter die vis is hoe meer krag word uitgeoefen en kan hulle sommer lag-lag hoeke oopbuig. Dit laat mens met die vraag: waarom gebruik ons dan steeds twee-hoek stroppe en vermeerder dit werklik jou kanse dat die vis wel jou aas sal optel? En as dit wel doen, wat is die kans dat jy jou vis wel tot in die net sal kry? Miskien is dit nie ’n slegte idee om ’n enkelhoekstrop of twee ook in jou hengelkas te hou nie? Veral wanneer daardie ou groot karpe wat so goed kan baklei in die omtrek is. 3 - Maak die regte knoop by jou hoek!Die derde geval waarna ons ook moet kyk is korrekte hoek penetrasie. Die sterkste deel van die hoek is vanaf onder in die buig to bo by die ogie, en indien jou hoek nie diep genoeg in die vis se mond haak nie, maar net op die punt haak, verhoog dit ook die kanse dat die hoek kan oop buig. Die hoek moet diep genoeg penetreer sodat dit tot in die buig van die hoek deur die vis se lip haak om te verseker die hoek sy werk moet doen daar waar dit die sterkste is. Een van die maklikste maniere om te verseker dat jy maksimum penetrasie van jou hoeke verkry is deur te sorg dat die knoop waarmee jy die hoek knoop van so ’n aard is dat dit keer na keer in die vis se mond sal haak. Die aanbevole knoop is die snoerknoop of die knooplose knoop. Hierdie knoop draai die hoek se punt so dat die krag direk op die punt inwerk. Gaan besoek gerus hierdie skakel en sien hoe om dié knoop maklik te maak. Die hoek haak keer op keer en sorg vir ’n goeie “hook hold”. So voordat jy weer jou volgende groot vis verloor, gaan kyk gerus weer na jou stroppe, hoeklyne en hoeke en bring die nodige aanpassings aan, en wie weet, dalk pronk jy binnekort met ’n voorbladvis!