Wat Is Nodig In Die Hengelkas?

’n Hengelaar sonder ’n behoorlike viskas is soos ’n bosluis sonder ’n koei. Jy het ’n keuse waarvan jou kas vervaardig is nl. hout, blik of plastiek. Die praktiese oorwegings is iets van sy eie, maar dit gaan daaroor dat dit vir ’n mens moet werk. So lyk ’n netjiese hengelstel. Die kas: Die grootste uitdaging is waarskynlik om ’n viskas so eenvoudig as moontlik in te rig - en dit kom eintlik net reg met ondervinding. So in hierdie geval is dit die beste om uit ander se foute en ondervindinge te leer. Wanneer dit nie moontlik is nie moet mens maar self deur die groeiproses gaan. Tensy daar van die begin af baie goeie inspraak gelewer word deur iemand wat weet wat hy doen, begin dan eerder konserwatief met die keuse van ’n viskas. In so ’n geval is daar veilige en goedkoop opsies in plastiek soos die tipe soortgelyk aan gereedskap trommels. Die voordeel is dat sulke trommels later vir baie ander dinge as noodwendig vir hengel aangewend kan word, of hengel ekstras kan saamdra soos byvoorbeeld ’n rol nuwe lyn, komponente om stroppe te bou of ’n tweede botteltjie van daardie spesiale dippies waarvan baie gebruik word. Hout kaste kan aan die swaar kant wees en moet goed behandel wees teen water, maar hout vertoon altyd mooi en verleen so ’n bietjie van ’n nostalgiese en eksklusiewe karakter tot die hengelaar se uitleg. Metaal kaste kan mettertyd begin roes en selfs ’n hoë kwaliteit verf afwerking kan vlekke kry van die aggressiewe tipes fluoresien wat in dips gebruik word. Hoe goed ’n viskas hou word bepaal deur hoe goed daarna omgesien word. Die viskas se grootte is belangrik vir die inhoud daarvan en ook vir die staander waarop dit moet pas. Wanneer tuisgemaakte en aangekoopte items gekombineer word moet vooraf seker gemaak word dat mates by mekaar sal pas. Die uitleg binne-in die kas moet ook ten minste van so ’n aard wees dat dit pas by die voorgenome inhoud daarvan, of moet aangepas kan word om die inhoud te akkommodeer. Dit is ongemaklik om klein items onder in ’n diep en donker kompartement uit te krap en dit morsig raak wanneer lang houers heeltyd omval in ’n vlak rakkie wat nie genoeg ondersteuning bied nie. Produkte hoef nie noodwendig in die vervaardiger se verpakking te bly nie en kan sodoende in verpakking van keuse oorgeplaas word om die kas funksioneel te maak en netjies te laat vertoon. Die binnegoed: Moderne verpakkings maak dit maklik om aas en dip produkte vars en skoon te hou mits dit vir die hengelaar prioriteit is. Die sterk kleurmiddels wat gebruik word dra maklik oor tussen botteltjies, die hande, waswater en ’n handdoek. Om die binnegoed van die kas netjies en skoon te hou is dus nie altyd so eenvoudig nie. Botteltjies met skroefdoppies mors meestal en alle houers met ’n indruk kop is ook nie skoon nie omdat ’n bietjie produk in die kop uitdruk boontoe wanneer dit toegedruk word. Sover dit aas en dips aangaan bly die beste raad: “less is more”. Met ander woorde, hou dit natuurlik en eenvoudig. Dit maak die keuses vir aas aanbieding makliker en ’n mens leer vinniger hoe om kombinasies uit te werk as met ’n tref-en-trap metode uit ’n hele arsenaal van botteltjies. Dit is nie nodig om “floaties” te hê in elke kleur en geur waarvoor daar in elkgeval dips is nie. ’n Skoon “floatie” kan self gekleur en gegeur word. Die eenvoudige plastiek kassie is ’n goeie begin. Stroppe oftewel eindgerei is krities tot sukses. Stroppe moet skoon en droog wees wanneer dit gebêre word om roes en verweer te voorkom. Dit is ideaal om elke strop individueel te bêre sodat dit nie haak en koek nie, en dit maak identifisering en vinnige gebruik moontlik. Klein bakkies wat kan asem haal werk vir stroppe. Dit help ook om die viskas uit te pak en die geheue te verfris met die inhoud daarvan voor ’n hengeluitstappie. Maak voorsiening om wen kombinasies saam in ’n rakkie te bêre sodat dit onthou word en maklik bekombaar is. Meeste jagters maak immers hul gewere skoon voor hulle met soveel meer selfvertroue die veld instap. Sommige voorstelle mag dalk oortollig klink vir die sosiale hengelaar, maar dit verminder frustrasie en dra by tot ’n beter hengel ervaring. ’n Viskas onder konstruksie.