Wilde Riviere in Afrika

Ons Vang Kurpers en Tiervis In hierdie reeks is vroeër beklemtoon dat as jy elders as naby die huis wil gaan hengel, moet jy ordentlike huiswerk doen en dit liefs met ’n hengelgids aanpak. Maar vir hierdie spesifieke hengeltoer het ek en Johan die Conqueror ‘Courage’ bossleepwa gehaak, en met bittermin huiswerk en kennis van watse omstandighede ons sou teëkom nie, behalwe dat ons wou tiervis en babers teiken, ’n tien-dae hengelreis noordwaarts aangepak Namibië en Zambië toe. Die “Courage” sleepwa is die kleinste in die Conqueror reeks, dis baie ligter as die ander waens so het nie ’n vuurwa nodig om dit te sleep nie. Dis ook dan die goedkoopste model maar bied steeds heelwat spasie en genoeg pakplek vir alles wat ’n hengelaar dink moet saamgaan! Die rede vir hierdie “onbeplande” hengelreis was dat ons visums vir ’n begeleide hengeltoer na Angola nie betyds bekom kon word nie, en is die toer sonder ons weg. Maar ek en Johan het nie kans gesien om by die huis te bly nie, en het toe besluit om die pad te vat, te ry en te verken waar die pad ons vat. Ek moet erken, met geen inligting van meeste van die paaie en riviere wat ons bereik het, was dit nogal ’n opwindende belewenis! Ons het wel kennis gehad van Katima en die Zambesierivier maar ons het baie verder as net dié twee riviere gereis en moes heelwat verkennerwerk aan die dag lê – praat van avonture sonder beplanning! Iets wat ons wel kennis van gehad het was om te sorg dat die “Courage” sleepwa behoorlik nagesien is en met alles wat ons op so ’n tog nodig sou kry toegerus was – insluitende natuurlik ons hengelgerei! In Katima omgewing het ons ’n paar dae oorgebly om te hengel en is toe Zambië in waar ons verder op die Zambezirivier tiervis gevang het. Sekerlik een van die mooiste visse in hierdie waters, die Olyfkurper of Nembwe - wat baie aggressief gryp na enige iets wat lyk soos ’n klein visse in die moeilikheid. Johan het hierdie pragtige kurper gevang met ’n klein swart Mepps swaailem wat al teen die riete af gegooi is. Die grootste tiervis van die toer is deur Vivian aangekeer en het ’n 11cm kunsvissie gevat naby Katima Mulilo. Johan met ’n mooi tiervis naby Kabula Lodge in Zambia gevang met ’n 11cm kunsvissie op die sleepmetode. Nou-ja, met dit alles agter die rug is ons vroegoggend uit Johannesburg uit en op pad in die rigting van Katima Mulilo in die Caprivi. Sonder moeite is die pad soontoe afgelê en is ons deur die Ngoma grenspos waar ons in Katima vir ’n paar dae langs die Zambezirivier gekamp het en onderandere tiervis en verskeie bream (kurper) spesies gevang het. Ons onbeplande toer neem ons van asemrowende watervalle op die Zambezi, na die Kwando Rivier wat die grens vorm van Botswana en Namibia tot by die bopunt van die Okovango Delta. Ek is seker elke hengelaar het in afwagting van die “grote” al gesit en wonder of die vis nie beter sal wees op ’n ander “spot” nie, en daar is toe besluit om die Zambezi beter te verken verder noord van die Zambië grens. Hier besoek ons die Ngonye waterval en hengel vir groot tiervis suid van die valle in vinnigvloeiende water. Na ’n paar dae se goeie hengel vat ons weereens die pad terug Namibië toe waar ons kamp opslaan langs die Kwandorivier en ’n paar nuwe visspesies op ons kerfstok byvoeg. Alhoewel ons nog weke lank die area kon verken moes ons ongelukkig begin huiswaards keer maar nie voordat ons die Koebangorivier in Botswana besoek nie. Die Koebangorivier is die slagaar van die Okavango Delta en die area rondom Shakawi is alombekend vir die jaarlikse baberloop wat in September plaasvind, ongelukkig het ons dit net gemis, maar so weelderig is die baberpopulasie dat ons wel goeie babervangstes geniet en op die koop toe ook mooi tiervisse gevang. In September vind die wêreldbekende baberloop in die Koebangorivier - ons het die ongelukkig gemis maar steeds mooi babers en ook tiervisse gehengel. Daar het ons aan die bokant van die Delta in die noue kanale gehengel. Na twee aande in Shakawi het ons hengelroete ge-eindig en vandaar gery tot in Kang in Botswana, waar ons oorgeslaap en die laaste been van die pad huistoe aanvat. Dit was ’n opwindende en leersame tiendagse hengeltoer in suidelike Afrika, soveel meer genotvol gemaak deur die gebruik van die “Courage” sleepwa. GOED OM TE WEET: Die grenspos van Botswana na Namibië is deur die Ngomahek. Vanaf Namibië na Botswana is dit deur die baie klein Mohembogrenspos. By alle grensposte hou paspoorte en voertuigdokumente byderhand.Die Baberloop gebeur in die lente, in September/Oktober. Dit hang van die reënval af en die hoeveelheid water wat terugtrek nadat die Delta gevloed het. In Shakawi het ons hengelreis geëindig. Ons is vandaar tot in Kang in Botswana, daar oorgeslaap en vandaar na ons tiendae-toer huistoe. DIE ‘CONQUEROR ‘COURAGE’ Die ‘Courage’ sleepwa is die kleinste in die reeks, baie ligter en ook die goedkoopste. Dis ’n gerieflike sleepwa vir hengelaars met heelwat pakplek. Dit is standaard toegerus met een battery met plek vir nog een indien nodig, ’n 90 liter watertenk en 1,8 ton Rubax as. Die koningsgrootte bedtent huisves ’n 2 x 2 meter bed, dieselfde as die ander waens in die reeks, die ‘Comfort’ en ‘Conquest’. Daar is baie spasie binne, alhoewel dit eenvoudig is en so ontwerp is om by die goedkoper prys aan te pas. Daar is nie klerekaslaaie nie, alhoewel daar genoeg spasie is beskikbaar vir eie houers, soos byvoorbeeld kratte wat van agter gemaklik in-en-uit geskuif kan word. Daar is wel nie ’n ingeboude stort nie maar jy kan steeds jou los stort saamvat, naamlik die tipe wat jy op die gasbottel draai. ’n Losstaande stofie pas lekker en ’n losstaande geyser vir stort kan gemaklik bygevoeg word. Ander ekstras kan self by die sleepwa gevoeg word soos jou behoeftes strek. Buite kan ’n groot, “L” vorm afdak en groot tent staangemaak word, en daar is voorsiening gemaak vir waterdreinering. NB: Vir hengelaars belangrik: Die ‘Courage’ bied voldoende pakplek vir visstokke, wat van agter regdeur na vorentoe ingeskuif kan word, en dit is sterk genoeg om enige paaie wat hengelaars mag teëkom te hanteer. In kort is die ‘Courage’ ideaal vir beide beginners en ervare manne – dit kan met gerief gehaak word. Die aankoopprys van die ‘Courage’ begin by R129 000.